真的是最後了，這晚你/妳會上線嗎?
《再見了...MSN，還有那一段段曾擁有過的關係。》
今晚過後，MSN就會正式停用，成為歷史。
即使來到這刻，我仍然沒有忘記，它曾經為我帶來的一段段關係。
你們有經歷過嗎？
首是…是相識。
「Hi，知唔知我係邊個呢…」『估唔到呀…開估啦！』
「咦，原來妳就係我同班同學？」『係呀。』
「你就係隻game同我同公會個位？」『無錯。』「你個頭像正喎…」『你都係姐…』
「喂，不如add哂佢地入黎一齊傾啦。」『好…等陣。』
相識過後，我們在這裡互相了解，逐漸變得熟絡，
我們無所不談，亦無需顧慮什麼，
邀請加入對話、M群、視頻...交流的方式層出不窮，
記得嗎？就是這個簡單的軟件，讓我們的關係愈拉愈近…
「不如我地約出黎食飯？」『咁突然，諗下先啦！』
「妳知唔知啊，原來坐我隔離個阿強呢…」『…唔係掛？』
『知唔知隻game出續集啦？』「緊係聽講過啦，不過唔睇好囉！」
「哇，呢到好熱鬧。」『係啊…多人傾先開心嫁嘛。』
接著的一段日子，大概是我們過得最愉快的時光，
我們甚至相信，這種日子必定能夠延續下去，與這軟件一樣同在…
然而，有些事情，經常來得相當突然。
「我開始要認真讀書，之後應該會少d出黎玩啦。」『吓，唔好啦…』
「我同A君告左白，一齊左啦～」『真係嫁？詳細情況係點嫁？！』
「我搵到工啦。」『嘩，出糧記住請食飯！』
『我決定左出年會出國working hoilday。』「去邊到？」『大概係澳洲。』
當時，心中不捨，但也明白這種事情總會發生…
而最重要，
「放心喎，就算係咁我都會keep住上線嫁嘛。」『嗯…』
是這一句話，讓我們的憂慮都一沖而散，
但事情的變化，永遠是快得驚人，想控制也控制不了。
「我今日去左自修室啦…聽日都要去。」
「依幾日成日都同佢出去玩啊，所以少上左。」
「打機？一場咋…返工真係好累…無曬精神。」
「係呢邊好難上網，好辛苦先搵到個地方上黎一陣…」
去到這一刻，雖然沒有親口說出來，
但其實心裡是很清楚的，有種東西…已經開始變質。
結果，不久之後…
『hi』「?」「無野啦…只係hi下…」
「下次比手機短訊我啦，依期真係無時間上黎…」
「佢幾耐無上過？」『已經幾日，佢話公司成日要OT，好累喎…』
「我見佢成日都更新Facebook，但就好少上…」『唉…』
這個曾經熱鬧過的地方，不知不覺，變得冷清、孤寂。
『呢期過成點?』「ok ar…」
「…」『…?』
然後…到最終…
A已經加入對話。
B已經加入對話。
「hi」
…
「有無人？」
A已經離開對話。
…
…
B已經離開對話。
他/她沒有再找過你，你亦同樣。
這段關係，就這樣無聲無息，一去不回。
這樣簡單、這樣無奈。
*
昨晚，我在翻看訊息記錄的時候，剛好碰到一個曾每日都聊天的好友上線。
查看了一眼，原來對上一次與他在MSN聊天，已經是半年前了。
襯這可能是最後的機會，我向他發送了一個訊息，加上一個icon。
「Hi…」
『?』
「無野，只係想襯MSN完之前懷緬下姐…」
『哦，你唔講我都唔記得就黎完XD』
「係啊，你呢期點啊？」
『幾好啦，岩岩升左職，多左幾舊水咁啦，你呢?』
「同你差唔多啦…哈哈…」
『係啊。好啦唔講啦，其實我都係on陣睇下有邊個上，
但已經無乜人嚕，之後再係Facebook、whatapps到再傾啦。』
「嗯，拜拜～」
『886~』
我關上訊息介面，當初的感覺…已經不可能再拾回。
原來，不用等到這天，我們的關係也早已結束。
再見了，msn；
再見了，新訊息和來電震動的音效；
再見了，曾經一晚用上數十遍的表情符號；
再見了，過去用鍵盤打上的每一字每一句；
最後，還有那一段段曾經擁有過的關係，再見了。
Search